حیرت ای بت صورتین گؤردوکده لال ائیلر منی

صورت حالیم گؤرن صورت خیال ائیلر منی

بو گونلر دؤرد،  بیری- بیریندن فرقلی اولان رومانین ذهنی سیطره سی آلتیندان چیخا بیلمیرم! رومان دئییلدیلر دؤرد یاشاییش مکانی ایدیلر اصلینده .  و البته اوچ دیل مکتبی و آذربایجان تورکجه سینین دیل و دیلچیلیک فاکولته سی ... اوچ دئینده ، آخی اوخودوغوم و سیزینله ده پایلاشدیغیم اثرلرین اوچو تورکجه ایدی. بیری فارسجا...

"دونیانی بیر یاندان یارپیز ساخلاییب، بیر یاندان سیلدیر قایالاردا بیتن گوده بوی مامیرلار. دونیا داشدان یاپیشیب، یاریپزدان یاپیشیب. سولارین آیدینلیغیدی، ایشیغین نورودور دونیانی ساخلایان..." "مولود سلیمانلی / کؤچ رومانی"

1.      بیرینجی رومان ایللر ( تقریباً 1382) اؤنجه مهدی عبدالهی و ساحیل آذرین امگی ایله کؤچورولوب و حاضیرلانیب اندیشه یایین ائوی طرفیندن ارشادا وئریلن و هله ده جاوابی گلمه ین!!! آذربایجانین بؤیوک یازیچیسی اسماعیل شیخلی-نین شاه اثری ساییلان (دلــــــی کــــور) رومانی ایدی. بو رومانی سونرالار یاشماقچیلار دا پولاد موغانلی نین کؤچورمه سی ایله ارشادا یوللامیشدیلار و یئنه گؤزله ییش یاخشی شئیدیر دئیه دوشونورلر. و آمما هئچ نه منی تبریزده دادگاهدان اومودسوز و آلتی آیلیق زندان حؤکمی ایله چیخاندان سونراٰ؛ تبریزلی شاعیر دوستوم سایین احد فرهمندی-نی امگی ایله حاضیرلانمیش و یاران نشر ائوی طرفیندن یایینلانمیش یئددی یوز صحیفه لیک دلی کور رومانی  قدر سئویندیره بیلمزدی. او آندا منه  دونیایا اومودلا باخماغی بخش ائتدی بو شاه اثر... بو اثره "دون آرام" آذربایجان دئییرلر... منجه، هر بیر رومان و حیکایه سئور و هر بیر آذربایجان دیلینه ماراق گؤسترن و هر بیر آذربایجان دیلینی دوز-عاغیللی اؤیرنمک ایسته ین کیمسه بو کیتابی اوخومالیدیر...