ائتیمولوق بی
ائتیمولوق بی
دَیرلی ائتیمولوق و تدقیقاتچی حسن اوموداوغلونا
سعید موغانلی
سندن سورا
تورپاغینی قاریش- قاریش ساتدیق بو اؤلکهنین
سنه سند تاپیلمایاجاق
یاشاسین کارتون وطن!
سن یوخسان، سؤز سوسور
سن یوخسان، سؤزجوکلر قیسیلاشیر
سؤز ساغیر قالیر
سن یوخسان، سؤز سویا گئدیر، سؤز سوو کاسیبلاشیر
سن یوخسان
سؤزون- سؤزونده سوسور قاراچای
سن یوخسان کی
سؤزجوکلر تهران دروازاسیندا
تحصّن ائتمیشلر
***
هله گونش قفهسینده چاینیکلر سوسوب
دومان یاغماغا بویلو
جلال شینییر قندقابیلارا...
تراکتور یئنه اوتوزدو شوخوملوقدا
یاتاغان کسدی تراکتورچولار
و ان فاجعهلی درد بودورکی
قفهنین اوباشینداکی «لال-کار»لارین گؤزونده سن وارسان
دیلینده سؤز دوستاقدیر!
سن گئدندن هئچ بیری حسن اوموداوغلو دئیه بیلمیرلر!!!
***
سؤز دوستاق اولسا اییلهنر قاداسی
دئییرسن قوس آجی چایا نیفرتینی
دئییرسن گلیب قاچیراق سؤز گلینینی
دئییرسن شاعیرلر کلاشینکف دوغسونلار
قورخوروق حسن
-«نه خیلی خطرناکه حسن»
دئییرسن لوایینی گؤندرک یانینا
یا دمیرچی حسنی
به نه ایستیرسن ائتیمولوق بَی
دموکراتلیق شیکست یئییب آخی
آزادلیق اؤزو ده انقلاب خیابانیندا
حبس ائدیلدی!...
«ائوین » ییخیلسین قورخو!
موغانلی قورخوسوندا ایت اوتاریر
یالاندان عاشیق اولور
بیردن بئش- آلتی قیزا.
سیتهلردن داشیرسان قلبیمیزه
«سؤزون- سؤزونده بیر قیز وار آدی زیبادیر
دوداقلاریندا وزن سینیقلیغی
گؤزلری فضولی کیمی قافیهسیزدیر
گونش قفهسینه حسرتم دئییر...»
احمد جاوادی سئویرسنمی؟
اوندا یاشاسین دوستاق!...
اوردا عم اوغلو- خالوغلو... باغیشلا اوموداوغلو
اوردا میر حسینین جدینه سیغین
تورک – عرب فرقی نهدیر کی
دردیمیز سؤز آزادلیغیدیر
سؤزجوک یادلیغی...
***
گلسنه سؤزجوکلری اعتراف ائت!
بیر آز تئز گل قاداسی/ کاشغرلی جانی/ براهنی حاققی/«گولو خالا» سؤزجوک بیشیریب/ سؤزون سؤزو سایت اولوب/ داها سؤز قیتلیغی اولمایاجاق/ دئنن ساز کیمی سؤز ده سیزین/ تکی یاشاسین دده عدالت- قاراچای/ زولفیه- زیبا/ کاماندار، شمشیر- لاله جوانشیر/ آتیلا کیشیزاده ایله علیرضا اوختایین باغیرساغینی تیکدی دوکتور هئیت/ سنده آغزینی تیک/ سؤز بئله گلدی سؤزلوک بَی./
سؤز آراسی سؤز یئرینه دوشر دئیم کی.../ دونن بیر کوچه قادینینا وورولدوم یئنه/ منه بیر سؤز اؤیرت/ سؤز آتماغیم گلیر/ سؤزو آتماق اولسایدی، تبریز زیندانینا سؤژ یاغدیریردیم/ هه سیما دیدارین اوغلونون پلنگ کؤینهیینی قانلی تاپدیق خیاباندا/ دئدیلر دوشمن اؤلدوروب/ آییرد ائلییه بیلمیریک بو سؤزو/ دوشمن اؤزگهدیرمی سؤزده،/ دئییرسن دوشمان دئیک، داها جینگیلتیلی اولسون اؤزگه سؤزو!/ هامییا سؤز آتماغیم گلیر/ موغانین سرین هاواسینین بوغدا لایلاسیندا یاتمیشام ایندی/ بیر آز قورخورام/ بیر آز کئف چکیرم/ بیر آز سئویرم رحمتلیک سولمازی/ او اردبیللی قادینی/ او تبریزلی قیزی/ بیر آز سئویرم سنی/ سعید متینپورو/ بو سایخاشلیقدا بیر آز دا قورخا- قورخا سفئحلهییرم...
«یاشماق» آذربایجان یئنی ادبیات درگی سینین وبلاقی